એકવાર શ્યામ તારી મોરલી વગાડી દે,

ગોકળિયું ગામ તું ડુબાડી દે,

એવી ચારેકોર ઝંખના જગાવી દે.

અડધું બપોર મારી આંખો લઈ ગોકળિયું ગોતે,

તું ક્યાંય નજર ના આવે,

આખીયે રાત ધૂળ ધૂળ થઈ,

ગોકુળની ગાયોની હડીઓ કઢાવે.

એકવાર પગલી તું ગોકુળમાં પાડી દે,

ગોકળિયું ગામ તું ડુબાડી દે,

એવી ચારેકોર ઝંખના જગાવી દે.

મોરપીંછ મોકલવું ક્યાંય નહી હોય તે,

માથે મૂકીને તું હાલજે,

રાધાને દીધેલો કોલ પેલો,

વાંસળી વગાડવાનો આખર તો પાળજે,

એકવાર એટલી ઉદારતા બતાવી રે,

ગોકળિયું ગામ તું ડુબાડી દે,

એવી ચારેકોર ઝંખના જગાવી દે.

શબ્દો – મહેશ શાહ

વાંસલડી ડોટ કોમ

મોરપીંછ ડોટ કોમ

ડોટકોમ વ્રુંદાવન આખું..

મારા કાનજીની વેબસાઇટ એટલી વિશાળ છે

કે કયા કયા નામ એમાં નાખું?

ધારો કે મીરાબાઇ ડોટકોમ રાખીએ તો,

રાધા રિસાય એનું શું?

વિરહી ગોપીનું ગીત

એંટર જો કરીએ તો

ફલોપી ભીંજાય એનું શું?

આ પ્રેમ કેરી ડીસ્કમાં છે,

એવી એવી વાનગી.

કોને છોડું ને કોને ચાખું?

ગીતાજી ડોટ કોમ ..

આટલું ઉકેલવામાં

ઉકલી ગઇ ખંડિત ની જાત,

જાત આખી બળે..તો યે ભાન ન રહે,

એ જ માણી શકે પૂનમની રાત…

તુલસી,કબીર,સૂર, નરસૈયો થઇએ તો

ઉકલે છે કંઇ ઝાંખુ ઝાંખુ..

એ જ ફક્ત પાસવર્ડ મોકલી શકે,

જેની સ્ક્રીન પર નાચે છે શ્યામ ..

એને કો’વાઇરસ ભૂંસી શકે શું?

જેના ચીર પૂરી આપે ઘનશ્યામ..

ઇંટરનેટ પર એ આવે થનગનતો

મારી વીંડો કદી યે ન વાસુ.

કૃષ્ણ દવે.

ડાળે કોયલને બેસાડીને
પીપળો કોરસમાં ગાય છે.

મંદ મંદ પવન લહેરાય,
અને વાંસળી સંભળાય છે.

ડાળ પરના પાંદડા સળવળે,
અને અનોખો તાલ સર્જાય છે.

આમજ તો કોયલ, પીપળો,
પવન ને પાંદડાનું બેન્ડ રચાય છે.

ડાળેથી કોયલ ઉડી ગઈ અને,
પીપળો એકલો બઘવાય છે.

- સાક્ષર