માર્લોન સેમ્યુઅલ્સે શાનદાર લડાયક સદી ફટકારવા ઉપરાંત સુકાની ડેરેન સેમ્મી સાથે ૧૬૮ રનની વિશાળ અણનમ ભાગીદારી નોંધાવતાં પ્રવાસી વેસ્ટ ઇન્ડીઝે પ્રારંભિક ધબડકા બાદ ઇંગ્લેન્ડ સામેની બીજી ક્રિકેટ ટેસ્ટમાં મજબૂત લડત આપી હતી. પ્રથમ દિવસની રમતના અંત સુધીમાં વેસ્ટ ઇન્ડીઝે છ વિકેટે ૩૦૪ રન નોંધાવી દીધા હતા. દિવસની રમતને અંતે સેમ્યુઅલ્સ ૧૦૭ અને સેમ્મી ૮૮ રન નોંધાવીને રમતમાં હતા. સેમ્યુઅલ્સે ૧પ બાઉન્ડ્રી ફટકારી હતી. અગાઉ કેરેબિયન ટીમે પ્રારંભમાં જ ૬૩ રનમાં જ ચાર વિકેટ ગુમાવી દીધી હતી. ચંદ્રપોલ ૪૬ રનના સ્કોરે આઉટ થઈ ગયો હતો ત્યારે પણ ટીમની હાલત કંગાળ હતી. ઇંગ્લેન્ડ માટે બ્રોડ અને એન્ડરસને બે-બે વિકેટ લીધી હતી.