નોટિંગહૅમના ટ્રેન્ટ બ્રિજમાં ગઈ કાલે ચોથા દિવસે જ ઇંગ્લૅન્ડે વેસ્ટ ઇન્ડીઝને નવ વિકેટે હરાવીને સિરીઝ જીતી લીધી હતી અને સાઉથ આફ્રિકાના આગામી પ્રવાસ પહેલાં નંબર વન ટેસ્ટટીમ તરીકેનું સ્થાન પાકું કરી લીધું હતું. ટ્રેન્ટ બ્રિજ: છેલ્લે ૨૦૦૮માં સાઉથ આફ્રિકાએ તેમને ઘરઆંગણે હરાવ્યા હતા. ઇંગ્લૅન્ડની આ ઘરઆંગણે સતત સાતમી સિરીઝ-જીત હતી. ગઈ કાલે વેસ્ટ ઇન્ડીઝ ૬૧ રનમાં ૬ વિકેટની દયનીય હાલતથી આગળ રમતાં ફરી એક વાર માર્લન સૅમ્યુલ્સની અણનમ ૭૬ની ઇનિંગ્સને લીધે ટીમનો સ્કોર ૧૬૫ સુધી પહોંચી શક્યો હતો. પહેલી ઇનિંગ્સની ૫૮ રનની લીડ બાદ કરતાં ઇંગ્લૅન્ડને જીત માટે ૧૦૮ રનનો ટાર્ગેટ મળ્યો હતો જે કૅપ્ટન ઍન્ડ્રુ સ્ટ્રાઉસ (૪૫)ની વિકેટ ગુમાવીને મેળવી લીધો હતો. હવે સિરીઝની છેલ્લી ટેસ્ટ સાતમી જૂનથી એજબૅસ્ટનમાં રમાશે.